المكالمة.. قصيدة بالعامية المصرية للشاعر: محمود السيد

المكالــمة
________
إياك تخاف من صدّها
خليك جريء …
أطلب رقمها وقول لها
إنك بريء …
وانك بَاقيت على عهدها
وانك وافيت طول الطريق
وانك أكيد مَاكرهتهاش
وانك أمين على حُبها ومَاخُنتهاش
ولحد آخر عمرها
فاكر لها ..
كل الوعود
وان الحياة في بُعدها أسوأ حياة
وان الألم مـن بَعدها
واصل لآخر منتهاه
وان الأمل مالهوش وجود
حتى الفرح بيبات حزين
سافر بعيد رافض يعود
إحلف لها …
انك لها …
مخلص قووي ..
مش حد مليان بالجحود
إشرح لها ..
إن الفراق بينكم محال أمر اتحسم
فكّرها حتى بكوز درة
ليلة شتا بينكوا اتقسم
فكّرها لمّا اتكعبلت سَندت عليك
فكّرها ياما اتشبّكت إيدها فـ إيديك
ولمّا كانت تعترف ..
إن الأمان كله فـ عينيك
ومهما هَيكون ردها ..
إسمع لها ..
إسمح لها .. بالفضفضة وخليك صبور
إوعاك تِطاوع عِندها وحاسب تثور
عبّر لها ..
إنك صحيح بتحبها
وانك غيور ..
وانت الوحيد بتحسها .
وان عيطت …
إرحم دموعها وضعفها
خليك قـَريب من قلبها
إثبت لها ..
إنك صحيح عاشق بجد
وانك في دُنيا العاشقين غير أي حد
بس انت حاول تتصل مَاتخفش صد
وبقلبك ادعي انّها .. عليك ترُد .
_________