قاللي.. قصيدة بالعامية.. للشاعر: على سيد شحاتة

أهداء الي روح الشاعر الجميل ..
علي سيد شحاتة
رحمة الله عليه ..
………
قاللي:
…..
هوه انت عايز دماغك تساع
الكون
وتتحمل
لوحدك هموم وطن بعرض وطول
وفاكر نفسك انك السبب
الوحيد
فى صفر
المونديال
وغربة الموال
وهجرة العيال
وبعد
العشا والآيات
تبات
متقطع فى الاربع جهات
وقلبك العياط
على
قطر العياط
وعيال
العشوائيات
يكفيك مرارة برشامة السكر
وحرقة
دمك فى التامين الصحى
وغلاسة
دم ام الطبيب الممارس
ونغززة
التحليل
والزغلله والزغاليل
والبخت
القليل
وبتارين البوتيكات
والفواتير
الوالعه
ولجان المتابعة
وقرف
الحصة السابعة
والشعلقة فى التيوتات
…………

رحم الله الشاعر الكبير على سيد شحاتة ابن محافظة المنيا البار، عاش بيننا كالنسيم ورحل في هدوء،حيث كان صاحب أخلاق عالية ومحب للجميع.