قصيدة بالعامية المصرية .. للشاعر: بدوي سلامة

مفتتح..
…….
خايف يـــــارب
والمَرة دي مش وسـوسة وشيطان
المَـــرة دي خايف عشــان
أنا رجلي خطت للذنــوب ..
من غير ما اخــاف
………
بيــاع سبح و اقلام
……..
الحكمة في الملكـوت .. إنك تكون مبسـوط
والسـيرة بعد المــوت .. إنك جَــدير بالذِكـر
يا تعيش وتفضل بطل .. يا يقـولوا حِلمه إتقـتل
يا تلاقي فُرصة وبـدل .. يا إمـا تفضل بِكـر
أكتـر صحاب في المحن .. بتكـون في حالة سُكر
وانا حِلمي لمــا إتركَــن .. بعتــولي ورد وشُكر
بعد اللي صـابُه البَــدن .. نرجـوا إلتمـاس العُــذر
وإن مـال عليـك الزمن .. خلينـا في الـ باي بـــاي
قلبي اللي صــابُه العَفَن .. معرفش ليـه وإزاي !!
من غير حساب ولا تَمَن .. واقف بيعمِـل شـاي
بيقـولوا عني عَويل
أو إني غيــر مُلتـزم بالوقت والمواعيــد
وميعرفـوش إنـي .. مُهتَـم بالتفاصيــل
وميعرفـوش عني .. غيـر شُغلي بالتحديد
وميسمعوش مني .. غيـر أيـوة حاضر جـاي
وإكمنّـي مش رغاي .. بيقـولو عني كئيب
أما الغريب في الأمر
بيقـولو كاتِب شِعر .. وله ديــوان و 2
واهو ده اللي قالــوا عليه
شكل الغُــلاف مضمـون غير محتـواه جـوَّا
معقـول يكون هِـوَّا
بيقـدِم الطلبـات من غير ما حد يحِس
دار الحـوار بينهم حـوالي ساعة ونُص
وبشكل غير مقصود سمعت هذا النَص
في المهنـة دي بالذات
واحد معــاه شهـادات .. زي الهـدوم والبُقـع
وانا زي أي زبـون .. معرفش ليه رافِض
دور الصنـايعي يكون .. من صفـوة المجتمع
وبكُل رِقـة وذوق
خدت الأمور بهـدوء
وكأني مش موجـود .. أو وقت شُغلي إنتهىٰ
سـقَّف وقال يا برنس .. إعمل له أحلىٰ عصـير
واعمل لي شاي نعنـاع .. وشوف حسـابك كام
لحظــةٍ دخــول بيــاع .. ومعـاه سِبـح واقـلام
بيقـول يا باشـا يا بيـه نفعـني لو بـ جنيـه
وإكسـب ثـواب أيتــام
محتـاج دخل بعـدها
إيده اليميـن أُودام .. والتانيـة شايلة عـلاج
كل الحضـور تنَّــح
كل الحضـور تنَّــح إلا اللي كان بيــاع
كان لسه مستفـتح قام مِـدي للمحتـاج
خادني الفضـول وقتها وسـألته عن حـالُه
وإزاي في عِـز الحَـر من حسـنة جيّــالُه
طلعهـا قال لله
والوقت مهمـا يمُــر كان ردُه صعب انسـاه
جايز يكـون مضطر والدنيـا واقفـة معــاه
خادني الفضـول تاني .. فسـألتـه باســتغراب
بين كل يـوم والتـاني .. بيجيلنا ناس أغراب
إلا انت
إلا انت فيك مني
جـواك كلام متحاش عن حِلم ضـاع منك
واديت لنفسك سبب إن الظـروف صعبـة
هِـوَّا العَــلام ببـلاش وكِبــرت على سِـنك
ولا انت مش مقتـنع إن الحيــاه لِعبــة
دمَّـع وقاللي كــلام .. فَكّــرتُه بيخــرّف
خريج آداب إعـلام .. معرفش يتوظف
واختــار يبيـع اقـلام
راس ماله في شنطة على كتـافُه
كلهـا شهــادات مالهاش قيمـة
معرفش يحـقق أهــدافُه .. فاختـار مشـوار صبر وعلقم
يا يكون بيـاع عنده عزيمة .. يا يمـوّت حِلمـه ويستـسلم
سبحـان الله بـ نيـة سليمة
طبطب على كتفي يودعني .. واداني نصـايح بالمجـان
متقولش شهـادتي هتنفعني .. وتقضي بقيت عمرك ندمـان
دوّر في حيـاتك على صفحة
واكتبـها بـ حِبـر .. يكون عرّقك
متسيـبش سطور فاضية في ورقك
وتنـام على حِلمك وتمـدد
كلها أيـام وهتتـأكِـد .. إن انت كسبت 200 مِنحـة
وان رزقك قَل من المـادة .. هتـزيد أضعاف ستر وصِحة
خليك شيّـال وقت الشِـدة .. واكتب اسبـابك واشـرحها
خليك سِندال أطوّل مُــدة .. واكسب غلطــاتك صلحـها
هستـأذن معلهش سامحني
وسامحني بجد ان لبخـتك .. أو خدت دقايق من وقتك
أنا كنت بفضفض مع نفسي .. دلوقتي ارتحت أما حكيتلك
أنا كنت بفضفض مع نفسي
دلوقتي ارتحت أما حكيتلك
……….
بدوي سلامة

اقرأ المزيد:

قصيدة “الفلاح العاشق” أشعار بالعامية المصرية..  للشاعرة نهى رجب محمد 

بتفكر في مين.. قصيدة بالعامية للشاعر: أبانوب مجدي

عندك حق..قصيدة بالعامية المصرية.. للشاعر: حسن محمد