قصيدة بالعامية المصرية للشاعر: احمد مراشي

مختلفه …
كانت بتتكلم عن الموت بانبهار
بمحبة كاملة وولع
وكأنها عن تجربة دايقاه زمان
عن لذة الخذلان ورا التاني
عن الأحزان وكونها تجربة لازم نخوضها
عن اقلام الحياة ونشوة نزولها ..!
وكنت بتكلم معاها عن اليقين ف الحب
تتدايق
عن الخير اللى جاي وقت الشموس ما تطل
تتاوب
عن انقسام القلب وقت الشوق
تمل وتسيبني !
وتسيب بــراح واسع من الأسئلة
بلالين مبتكملش طيران ف السما وبتحرق الفرحة
اسراب فراش زعلانة
فيه كلام كتير سيبناه على باب الخجل
وكلام جميل مرفوع عليه السلاح
فيه لغز مدفون جوا عينك ولا انا مدهون براءة
فيه قلب واقع مننا وقت الخناقة
فيه حاجة غايبة فيكي او فيا
فيه حاجة ناقصة ف ضحكتك يا صبية
هتقولي ايه هيا
ولا ابسطك بوفاتي !
********
نص كمان
********
عالم وهمي ..
……
الصبح
قبل الناس الوهمية
ما تروح اشغالها الوهمية
رشيت برفاني الوهمي
ولبست البدلة المصنوعة من نسج خيالي
ونزلت اسيب المطرة الوهمية
تغرق شعري الوهمي ..
هناك
في نهاية شارعي الأبدي
لمحت عواصف جاية عليا بشكل مبالغ فيه
وتيران صفرا وغربان بيضة
فجريت على بيتى الوهمي
واتكعبلت اما طلعت سلالمه الهوائية
الغير مرئية
علشان أتخبى ما بين احجاره الوهمية
من عالم وهمي بشكل مبالغ فيه ..
ولأن إحنا اللى صنعنا اللهجة
ولغات العالم
طورناها عشان نتواصل
او علشان نلمس احاسيس البنت
قررت يكون النص ده وهمي
قوافيه وهميه بشكل مبالغ فيه
علشان لو شوفتيه
تقريه
وتحسي بأن الوحدة محاوطاني بأوهام
او تعرفي اني مزارنيش حد حقيقي
لحد الآن ..
……………
#احمد مراشي