ما يطهرك نيلين وحفنة من دموع .. !! شعر: حامد عرابي

خليك في أوضتك واستكن
ممكن تصالحك دنيتك
أو حتي تضحك نجمتك
حتشوفها من بين السياخ
حلم وأمل
وان كان لابد
غامر في مرة وسب بشويش
الغرق
قشايتك الناشفه تلاقيها في شهقتك
ومعاها حزن النيل علي ..
قبرك تابوت
أسمنتي وش الصبح شرقان الندي
علبة سجاير الليل خلاص
كبريت حنينك للقاشطين
سراب
وقياسك المفرود كفن
النبض متعبي ف قزايز بنسلين
ومزاد حبيبتك لو بدأ
تتباع في أول كزيونات
والصيد زمان بيفكرك
سنارتك المفرودة ضللها
السمك
غمازها يغمز بالجنون
فتشد بوصتك للورا
همك تقيل
مبروك عليك فجرك ومات
حلمك تبات وعدك تبات
وتقوم علي حزنك في وشك
شَربك شاي الصباح
….. ….. …..
فجرك مات
والعمر كان
كيلة هموم
كيلها بالكدب الميزان
الكسرة جنبك تندهك لو يوم
تجوع
الجنة والهم التقيل ..
ليل النجوع
ما يطهرك نيلين وحفنة
من دموع .