ف المشمش.. قصيدة بالعامية للشاعر سعد الدين مخلوف

سعد الدين مخلوف
……………
ف المشمش..
…..
مشمش زمان للآن
يا خساره ماطرحشي
علشان كده قلقان
والقلب مارتحشي
لا طُلت عنب اليمن
ولا شُفت بلح الشام
للآان…
وكأن حلمي اتعقد
على حبتين فاكهه
كل الأماني والوعود
من صغري
جَتْ فاكه
جّمّعت أحلامي وصِبايا ف محفظه
حصّاله.. قُلت احتاجلها
طِلعْ الرصيد.. فَكه
مع كل دا
لا زالَ قلبي مقدسٌ رغم الضجيج
وهموني إنْ ابريل سيأتي بالفرج
صدَقتْ
وأتاني كل المحرومين.. المحتاجين
العشمانين.. ف الوقت
أقفاص صدورنا كلنا
مستنيين
عقدة زمان.. تتفك
ياللآسف..
مظاليم
مشمش زمان ماطرحش
والشك يطرح شك
………
******”
شاعر قليل الحيله والحِنكه
رغم اكتمال الفلسفه حكمه
تاج اجتهادي ع الورق إنجاز
فكري مهذب بل خلوق جداً
قلبي بيدّنَ قبل اما ديك يدَّن
معاناه بتاخد عقلي للإعجاز
جايز.. كمان ربما
صوت السكات ف كلامي بان عوره
فأخدتْ بعضي عشت جوا الحيط
البرد أطول من قصايدي والغطا
لَّفّيت ضلوعي بالقوافي أرتمي
ع السطر واتغطيت
يا عنتره العبسي قيدوا معصمك
دبحوا القلم
وادوني طرف الخيط
لَّمِّيت الشعر والنثر اللي ميت ف الخلا
ودفنته جنب البيت
بَكِت المشاعر واللي شاعر لم صِحي
الحبر ينزف مِستحي
ناشف يا عود الأدب
عطشان تِفَّلَّق سرايب
زرعنا ف الغيط
………
*******
1-
أنا كاس كازوزا بس مليان دم
لو هزوّا روحي يبقى فورت يا عم
وان يوم وقَعتْ أبقى رُحت بلاش
إزاي قزاز م الأرض راح يتلم
2-
أنا ليه مجرد والكلام اتمنع
خيال مآته ويقولولي جدع
رابط لساني حبل من زوري
لو حب ينطق الحبال تنقَطَع
3-
إنفد بجلدك بس من غير زَقّ
إمنحني خطوه جنبك القى مَدَّق
الجري نص المرجله.. يمكن
أما الرجوله هي كل الحق
وعجبي،
………….
سعد الدين مخلوف