بتول .. قصيدة بالعامية المصرية للشاعر: ناصر محمود

محتاج أمشي
عكس دوران الزمن
واسبق
خطوتي ف العد
محتاج لناس
مش بشر
أشاور
بيعتولي الرد
مليت
م الطبطبه ع الكتف
و كلامهم الماسخ
ع المخاليق
هربت في سكه اللي يروج مايرجعش
لقتني لسه
في أول الطريق
غمضت عيني
وقولت ماعرفهمش
سحيتني الدنيا للأحلام
عيش تتعاش
و اهي سكه
افرح وانبسط حبه
فحبيتها
لكنها ماسخه
و وشها مهدول
بتول لكنها حبله
ف جابت
واد ع الكيف
مين قال
إن الدنيا تعقيده
ولا ابتسامه
ع الشفايف زيف
حلم الغلابه
لقمه
بس تبقي نضيفه
احلم باعم
وسيبها ع الخالق
رب العباد اقسم
ليحاسب الظالمين
ولو النهارده سلف
بكره بردوا الدين
انت مين
انا
انا الحلم
اللي متشعبط
ف ديل توبك
وانا القلب اللي عاش
يلف ف دروبك
وانا قهرك
وانا مهرك
وانا طهرك
وانا ذنويك
انا الساكن جوا منك
مش بكيفك لا
غصب عنك
لسه طيفي بتلمحيه؟!!!
حواليكي في كل الاماكن
وان فتحتي مرة قلبك
ها تلاقيني
لسه ساكن
مش بكيفك
لا
غصب عنك
………….
ناصر محمود