“آخر محاولات الهروب”.. قصيدة بالعامية للشاعر: ابراهيم رزق

كان كل شيء حواليك بيوحيلك
إن النهاية فاضلها أمتار …
الضلمه بتغطي المكان ..علشان
مفضلش من ضحكك نهار
هتموت خلاص !
فِكرك مريض مبقاش بيخرج من محيط الرآس
محبوس فـ دايرة والجميع حُراس
خوفك وعجزك والقدر أجراس
بيزيعوا فـ عنيك القلق …
هتموت خلاص!
كان دا الشعور اللي إتخلق ..
شوفت الأمل عابر سبيل أعمىٰ
والدنيا أضيق من ممر الحَلّق
ومفيش ف كدر الرؤيه غير عين التُرب
الخوف هنا رابط إيديك
والليل هرب
والشمس جايه بضيها تقبض عليك
والحزن اهو
واقف بيزرع فدانين فـ عنيك
ومفيش فـ جسمك نص سنتي سليم
وبقيت لوحدك يا إبراهيم…..!
عمال تعاتب ف القمر يحضن سمَاك
واهو كل ما يقرب عليك… شمسك تِضله
ومفيش معاك …
غير جسمك المنحول وضِله
ولا قد بهدلة النهار ولا قد حِمله
بتشد ملك الموت عليك وبتبتسم لُه
فـ يعدي جنبك من سكوت ويشد غيرك
تايهه فـ نفسك والفراق بقى خط سيرك
مبقتش تتخطى الحواجز والخساير
وبقيت تخاف لـ تكعبلك فلل السجاير
وبقيت تخاف لـ تكعبلك ..
وبقيت تخاف..
تبدر تقاوي الفرح تطرحلك عِجاف
وبقيت تخاف ..
الخط يفضح رعشتك والحبر جاف
ف بقيت بتكتب بالرصاص
هتموت خلاص…!
مش كنت عيل من يومين ؟؟
بتنط سور المدرسة…وبتتني كم المريلا
كان كل همك فـ الحياة إنك تحل المسئله
1×1يبقوا كام؟
بتحل واجبك مـ العِشا وتدخل تنام
كبرت معاك الأسئلة
وبقيت بتسرح فـ الصلاة
مبقتش عارف مين إمام
وبقيت بتسهر والسهر يدخل ينام
من بعدها اسودت عنيك
والليل هرب
والشمس جت تحكم عليك
“يتوفى رمياً بالرصاص”
هتموت خلاص؟
وهتبقى دي نهاية المجاز!!
طب مين هيبقى لـ ضهر أبوك عكاز ؟
ومين هيبقى لوالدتك ضِل وغطا
شِعرك شريك المرمطه ..والنوم فـ أحضان الرصيف
واخوك شريك الأرض ونصاص الرغيف
والحلم لما يكون كفيف ..يطرح ممات
هيودعك صمت المباني والأوكر والبوابات
والكراسي الساكنه جوا البلكونات
والدموع اللي بكيتها لحد مات ..هتودعك
كلهم مبقوش معاك
كلهم مبقوش مَعَك !
حتى ودن الحيطه رفضت تسمعك
………..
ابراهيم رزق