قولتلها ممكن نلتقي تاني
قالتلي صدفة!؟
قولتلها لا
بميعاد.
يمكن نصلح كل شيء محصلش
في حاجات كده
بتعيش إذا تتعاد
قالتلي لا
قولتلها عندك حق..
طب تعرفي
ساند بطولي
طولي
من صغري
وأنا قلبي لولي
لولي
لو تدري
أسبق نهار الناس
يبان فجري
فإزاي سبقني العمر وأنا باجري؟
طب تعرفي
لو قلبي
غمض مرة بيشوفك
وإن قلبي فتح مرة
بيشوفك
وإن قلبي كان غير قلبي
هيحبك
وهيبقى نبض حياته من شوفك
فـ إزاي ما بينا بعاد
وليه حاصل
وإزاي برغم البعد نتواصل
وإزاي بحبك
وإنتي عني بعيد
ممكن نعيد قصتنا ونواصل؟
قالتلي لا
قولتلها عندك حق..
أنا في انكساري ونصري
بافتكرك
وإن قلت هانسى
بانسى وأفتكرك
تفتكري مهما تعدي بيا سنين
هل فيه حاجات تمنعني عن ذكرك
في حاجات كده بتعيش مع الأيام
مهما السنين بتزقنا لقدام
مهما الليالي تمر
حلو ومر
أنا بيكي بس
هابقى فل تمام
خليني أقولك عامل إيه بالظبط
خليني أوضح
كل شيء مدفون
من يوم فراقك كل ساعة بلون
عارفاني دوغري ماحبش الألوان
دليني طب
على حاجة للنسيان
قالتلي لا
قولتلها عندك حق..
ندمان وعيني من البكا باشت
كل الحاجات المبهجة اتلاشت
مبقاش فاضلي غير صور لينا
عملتها مركب
جه الطوفان عاشت
خليكي أقرب بر في التوهة
خليني جنبك لما تحتاجي
وأنا هوحشك عارف
وهتعاندي
وهتوحشيني بس أنا هاجي
يمكن تحني في مرة
وتليني
خليني أحاول تاني
خليني
يا تصيب
ونرجع تاني زي زمان
يا تخيب
وصورتك تمشي من عيني
وإن قلتي لا
أهو يبقى عندك حق.
اقرأ المزيد:
قصيده ;الفلاح العاشق اشعار بالعامية المصرية.. للشاعره نهى رجب محمد
تعليقات