(المؤامرات العادية).. شعر بالعامية المصرية .. للشاعر: عمر هلال
ما باطمنش تقريبا بقالي كتير
وفيه أصوات بتندهني
وببدأ اشك ف الأشياء بلا استثناء
لدرجة إني يوم شكيت ف تليفوني
عشان سلمت للـ GPS… توهني
وباصحى كل يوم بدري عن المواعيد
وانبه ساعة التليفون وانبهني
بخاف لو نمت ف الشقة ال تحت ما اقومش
ومن صوت الفران إذا هتغني ف المنور
بشك ف لمبة الحمام
عشان من يوم م قولت قصادها إني بخاف من الضلمة
بقت بتطفي وتنور
بشك ف شكلي لو معكوس على الميه
وف مرايتي
وف الكاميرا
وسامحيني لإني بقيت بشك ف شكلي ف عيونك
انا اللي بشك لو هلمح فلانه ف زحمة المشاريع وطالت نظرتي ثانيه عن المعتاد…
عنيا تبقى بتخونك
ما باطمنش تقريبا بقالي سنين
وخايف تبقى دي الناهية
كإني معايا سر خطير يودي الناس هنا ف داهية
بشك ف نفسي لو جددت
وف الأشياء إذا اتعودت
وشاكك حتى ف شكوكي
ولو زادت شجاعتي ف مره و اتأكدت .
…………….
اقرأ أيضا:
تفاصيل التمهيد للمؤتمر الثامن لمؤتمر شعر العامية عن جمعية مبدعي مصر
تعليقات