الخنجر.. شعر بالعامية المصرية.. للشاعر: اسامة سند

قلبي رغيف بتَّاو على مطْرَحَة
للتَّو خارج من شقايق رَحَى
لا تلَدِّنِيِه ولا تتركيه في الخميرة
ولا تحرميه لمسة إيديكي الخبيرة
أول قتيل من خُصلة متسرَّحة
طب خلِّي عنِّك والنبي خليه
لو مر طيفك جنبه أو خال ليه
تلاقيني واقف لسَّه مستنظرِك
ده لولا حضنك ما التقيت خنجرك
يسلم لي حُسنِك ربنا يخليه
*******
نص تاني
،*******
في هيكل الذاكرة
….
يمكن
يجوز
شيء مُحتمل
أعْديكي من جرحي
واعَديكي اللي فاضل
من عذابات الأمل
شكل الحياة
الضحكة
مسرح شكسبير
غناويكي وانتي بتستحمي بلمستي
خناقاتك اليومية مع عُقب السيجارة
وانتي بتمصيه
وهو بيشربك
طعم البراندي وهو في لسانك
وأقواس القزح في عينيكي وانتي بتلعبي بإحساسي
صياد السمك
دم الطماطم
لما تنزف بين شفايفك
متعة الفخ اللي حن على الفريسة
لما بصت له بحنانها
فاحتضن فيها الأنوثة
فاحتضر فيها اللي باقي من المقاومة
مين يقول العشق يخضع للمساومة ؟
والملاك اللي اتفطم تسبيح
يسلسل روحه في حبال من مسد
واما الشموع تنزف دموع
بتعيد في تكوين الجسد
يمكن
يجوز
شيء مُحتمل
قلبك يتوه في السكة من غير ما التقيه
وساعتها بس هتعرفي
إحساسي وانا جوا المتاهة
يبقى إيه .

اقرأ المزيد:

(المؤامرات العادية).. شعر بالعامية المصرية .. للشاعر: عمر هلال