قصيده بعنوان رهن القسمه.. للشاعر عبود حداد

…………………….
وكل ما بشرخ من جوّاكى . بلقاكى
شايله على قلبك حمل تقيل
والحيل . شق الصمت ف روحك
قابض على روحك قاتل ياقتيل .
لضم وريد الدنيا ف إبره
بيخنق فيها ومنها البوح .
سرّك ليل . كفّه على وشّك مشبوح
من صمتك . هيّئت ف صورتك
قلّيبتك ع الوجهين
قلت لعلا أرج الملّه
تنفُك العلّه ينط البين .
واستنّيت . إستنّيت
أستنى لا يمكن
حال واتحال لمحال
حال المحتمل . والممكن .
………….
بتمنى أكون الشّط
للبحر الشارد بعيونك
دمعك موج . يرمى عليا همومك
إن يرسى البحر بيصفى
على خدّه ضى القمر يبهر الوجدان .
………….
البوح دبّاح لو باح
ولسان الإنس شيطان
ليه بتصمم وبتضغط ع الكتمان .
…………
صمت الاحزان جان
وآهات للكبت بتتألم
ومادمتى نطقتى السجّان
على فك لسانك بيسلم .
…………..
أرجوك
أرجوك بس كفايه
ضغطك بيزلزل جوّايا
ولسانك كرباج
بيلسوع فى كيانى
أو يااااانى .
………….
إياك فاكرانى بشط خسيس
سرّك لو ينزل ما يطلعهوش قواديس
بلسان فى شفايف بيمدّوا الخير
حستنى كتير . ولا قلتى آمنت
………….
أنا بنت . لكن مش ذىّ البناويت
بحصادى من زرعى اتربّيت
عرقى قنايه وعروقى شرايين الغيط
رسمت العلم جناح مطلوق
كسرت رياح حضنّى الحلم
شهقنى الشوق
خادنى لدنيا عليا انفتحت ومافتّحت
عين شمس حجبت عينى
حجبت عينى أيادى وطايله
فى طريقى فحتتلى لفوق
عترت وقعت أتارى الفحت
خايدنى ويّا جدورى لتحت .
رسم فى وشّه البراءه . طمّنى
بلسانه النشابه بسطنى
رق فؤادى شكّلنى
ع النار الهاديه سوّانى
بالورقه العزريه لفّنى وأكلنى
من عينى قطف الننى .
وما بين اللحظه وبين
بطمّن روحى وهمّى صرخت
بدلها كتب بتراب الفحت
ندبت الخد كتمت البين
لطم الشاشه شال الصوره
حجب العين.
أيوه . أيوه بقيت رهن القسمه
بس الغلطه . غلطة مين
قوللى الغلطه غلطة مين .

* الشاعر عبود حداد احد اهم كبار شعراء العامية في مصر، وله مجموعة دواوين شعرية وهو من الرواد، وكتبت العديد من الدراسات النقدية أكاديمية في شعره، ويتمتع بصوته الشعري الخاص والمميز.