مش عايز احلم.. قصيدة باللهجة العامية المصرية للشاعر: عبد الرحمن مصيلحي
صفين بيادق واللسان مقطوع
وحصان بيرمح دمه بيفرفر
وفراش كتير بيلون البساتين
وجناح يمامه جنبي بيرفرف
كان كادر يشبه فيلم في السيما
تذكرته غاليه بس له مريدين
خرجت موسيقى من كمان بالغصب
تشبه لحضن المايه للدلافين
ف صحيت لقيتني رافض اني احلم
واكتب كلام الكدب في الاشعار
خطاط في صدري علم الميادين
وعيوني كاميرا وقت ضرب النار
مهزوزة جايز بس ملحوقة
همحي الغبار من العدسة والزقها
هخلع دموعي بدال ما اهزقها
وهجيب كمان برواز علي قدي مش بالظبط
يقدر يساع الصورة لو تتهز
يقدر يحابي حاجات كتير تتعز
يقدر يخبي حاجات عن العالم
ويداري دمك في الصور لو نز
قتلوك ووقفوا يباركوا بالدعوات
والعين بتفضح بس ستراهم
غموك عشان الضلمة فيها حاجات
مش شرط تظهر ليك فتلقاهم
خطيت صراطك شوك وكسر ازاز
وجريت لآخر نفس لما أتقطع منك
طبيت لوحدك في الطرق بردان
مالقيتش منهم حاجة هتهمك
زحمه ودوشه وهيصه مش قبلاك
لا فضلت عايش وسط لمتهم
ولا خدت حاجه واحده تبقي معاك
سالوك ملايكة ومش لاقيلك رد
مستني حد يدور الزمبلك
صفين بيادق مصفوفين حواليك
وفي غفله تلقى حصان يكش الملك
يعرف ساعتها إن الونس كداب
والضلمه اصدق من شعاع الضي
وإن البشر بتكون نسخه من التماثيل
بعد انتهاء النص ده مضطر
اخد بيادقي وأكسر التشكيل
… ….
اقرأ المزيد:
تعليقات