مولد بلا أسياد.. شعر: احمد عصام عبد الكريم

عالم.. وإن هانت نُهاهم
ما انتهاهم
جارّين سواقي الحمل..
يتباهوا بغماهم!
لا والأكادة..
غِيّهُم صادف هواهم
مين هُما غير انت وانا؟
طب مين غواهم؟!
الوالي.. ولا الولي؟
المخفي.. ولا الجلي؟
المبدأ الأوّلي.. لمّا تحاشاهم؟
ولّا وقارهم سِلِي.. وفارق مَحيّاهم؟
يا لعنة المبتلي
دايرة ومالهاش باب
سرداب طويل.. آخره:
غولة طويلة الناب!
مين ساب قلوبنا البريئة..
في حاوية الأسباب؟!
جلاب وجاب في النواحي
وبرك على الأعتاب
جاوي البخور؟ ولا شاوي؟
ولا حرقت كتاب؟
غلباوي سارح بحاوي..
عملوا افتتاح كُتّاب
قام جه صاحبنا الحصاوي
وقلبها كتب كتاب
انا مش قليل الرباية
دا انا لسه فارق معايا
ليه ابقى بره الحكاية؟
انا هافضل ألعن عمايا
وأحلم بعين بتشوف
وأدعي ساعات بالهداية
وساعات بموت الخوف

احمد عصام عبد الكريم