أنا مش متشاف.. أشعار بالعامية المصرية.. للشاعر: السيد طه

أنا مش متشاف …
لو حتى اتسلط حواليا
ألفين كشاف ..!!
أنا عايش وسط البشرية
كائن شفاف ..
وكأن عيون اللي شافوني
لها ألف غلاف .!!
ولا شكلي بيطلع ف مراية
لو واقف باضحك قدامها
ألاقيها تجيب اللي ورايا ….
حلو الأوصاف …
وتجيبني ف لحظة ماتشوفني
بالقاضية ولمس الأكتاف ..!!
براويز الدنيا اللي ف عيشتي ..
مش راضية تشيل أبداً صورتي
أنا حتى مسكت الطباشيرة
وحاولت ارسمني ف سبورتي
كل الألوان هربت مني
وقالتلي باخاف .!!!
طول عمري الحافظ
لمقامكم
وأنا واقف دايماً قدامكم
طب ليه مش باين
ف عيونكم
ولا فيه إنصاف ..!!
ولا حد يلم حروف اسمي
ويرمم بيها شروخ جسمي
يمكن يشوفوني
اللي فاتوني
ولا حتى بكلمة افتكروني
يوم عيدي ..
وقالولي عواف …!!!
أنا خايف حتى من الآخرة
النار تهجرني وتنساني
والجنة الاقيها مخاصماني
والاقيني واقف وحداني
فوق الأعراف ..!!
وانا مش متشاف ..!!
**************

اقرأ المزيد:

الخنجر.. شعر بالعامية المصرية.. للشاعر: اسامة سند

(المؤامرات العادية).. شعر بالعامية المصرية .. للشاعر: عمر هلال

تفاصيل التمهيد للمؤتمر الثامن لمؤتمر شعر العامية عن جمعية مبدعي مصر