اوعاك تشيل.. قصيدة بالعامية المصرية للشاعر: الحسن عبد الشافي محمد
شارك
إوعاك تشيل
قلبك يِكْفيه ما فيه
من غير ما تكره وسيع
ما تزحموش
اللي بيصفيه شجيع
اللي بيصفيه حويط
خفيف
خليه خفيف
اللي مبينساش ضعيف
واللي ما بيعمل عبيط؛ إنسان عبيط
سامح
بلاش تبخ القلب بامبارح
البحر يرمي الزَّبَد
يرفع غريق
كل ابن آدم شقيق
والقعدة واحدة فوق حصير العُمر
نفس الرغيف
نفْسها الأطباق
نفس التعب
والحَمْد
والأشواق
لحياة خفيفة في النهار الجاي
لولا الجروح كان مين هينفع ناي؟
اُعذر عيال الله في أرض الله
قول: غصب عنه
: مش فاهم
: عذره معاه
دا الكل يغلط طول ما فيها يعيش
لو حق -لازْمك- خُده
لكن بشويش
أقوى الكفوف تاخد وما تعرِّيش
أقوى الكفوف اللي بتفتح باب
وتسيب مساحة للجميع أحباب
اقرأ المزيد:
قاللي.. قصيدة بالعامية.. للشاعر: على سيد شحاتة
الكلام لما يموت.. قصيدة بالعامية المصرية للشاعر: مسعد العقبى
شارك
www.elmkal.com/?p=41277
تعليقات