قصيدة بالعامية المصرية للشاعر: سامح عبدالفضيل

في المناجاه
واشتعال البوح
الروح
بتدخل روحها
من الباب المفتوح
والذات تنجذب للذات
والروح
تقطع زراير الجسد تقلعه
بره علي العتبات
وتحس باللذات
وتشف
وساعتها
حتي النسيم بيخف
والكون بحق كن
فيكون
يلبس عباية السكون
ويهدي ويبطل يلف
ويتقطع خيط الزمان
والمكان يفضل يطوف
ملهوف
عايز يشوفله مكان
والهمهمات تلميح
ريحة الهوا تسابيح
بيقولوا أهل الرضا
الوصل أصله مريح
يا ودود
يا ودود
يا ودود
يجي اذن الانكشاف
العين من الانوار بتعمي
والقلب بحبال المدد
هوا اللي شاف
وف حضرة الحاضر
الجسم مش حاضر
كل الوجع يختفي
بس الحضور حاضر
والانس بالمحبوب
بيض سواد الذنوب
ومن جمال الجلال
الروح هناك
بتدوب
و النور
بيكشف المستور
ويفيض و يبقي بحور
مسك وندي وبخور
تتوضي منه القلوب
وتوب
وتخش في الحضرة
كل الوجوه نضرة
كل العيون خاشعة
كل القلوب خضرة
والحزن وسط الجموع
ميت ومش حاضر
في حضره الحاضر