قصيدة بالعامية للشاعر: على خليل

بادر هروبك فـ البشر جعانين..
ياكلوك ياولدي ويحلو باللي معاك
مديت يديك تنقذ الغرقان..
شديته برا قام وقف و رماك
بادر هروبك بس هتروح فين..
دا وباء وسايد من هنا لهناك
العمر عدا واللي فات عمرين..
الجاي قليل والحياه سرقاك
بالاسم عايش وانت ولد الموت ..
جثمان ف أرضك روح سحاب ف سماك
الدنيا صعبة خليكي جوا متطلعيش
……
ولا أقولك
نوليني حضن سريع
أنا لسا حابب أعيش
جلدك حرير
وانا جلدي حتة خيش
حضنك مريح
وانا حضني زي الجيش
أيدك مزيج
بين المرض و الشفى
روحك ملاذ
وانا روحي روح مشعفة
دمعي الفولاذ
شافك فحن أنهار
قلبي الغابات
قلبك الاشجار
جسدي الازاز
مسكين عجين من طين
جسدك منار
وأحنا اللي بني أدمين!