يعِزْ عليّ .. قصيدة بالعامية للشاعر: مجيب عيد

يعز علي أكون رحال على مركب
ويفضل شطها واقف ما بيودعش
ولا ببسمة !!
ولا بدمعه !!
ولا بتنهيده أو آهه
كأنه عايزنى أرووووح ما أرجعش
***
يعز علي أكون نسمه أمل صافيه
ما نيش كداب
ويفضل شعرها السايح
كما اللبلاب ..!!
ما بيهفهفش
ولا نظرة حنان منها
ولا لمسة ايدين دافيه
ولو تقبل تكون جافيه
أنا ما اقبلش !!!!!
***
يعز علي اكون صورة
ف عز الفرح منسيه
ووقت الضيقه منعازه !!
ووقت الضنك ؟؟
باكون راجل ولا مليون
واضحى بكل ما أملك
ولا باندمش !!!
***
يعز علي اكون حاسس
بما فيها
وادوب ف تراب حوافيها
واطبطب فوق جدايلها
وادلعها واحايلها
تنام هي وانا ما بانامش
***
يعز علي اكون فى الفرن
انا نارها
وتحت الارض حفارها
وأغلى خطاوى مشوارها
وخيرها يرووح كده كله
على اللى ماشالش
لا همه تبقى فرحانه
او زعلانه !! متضايقة
ولا عينها تكون رايقة
وخالية من الدموع والغش
***
يعز علي اكون
خير الولاد فيها
واشيل عنها ما يبليها
ووقت الجرح أداويها
ووقت الحرب مغوارها
تقوم وقت ” السلام ” تعمل …..
بإيدها …….
كام بطل ” من قش ”
……………
نص كمان لأن شاعرنا مقل في النشر
*********
أنا المصرى ..
…………
مابين رجلين كواها المشى
وايد تخطف وتتصارع
سابتنا التوهه ف السكة
رمانا الماضى لمضارع
وانا كنت ابنك انتى وبس
مارد فارد بطول فارع
واسد ننى عين الشمس
عشان خاطرك وانا الصانع
وانا ليكى و دايب فيكى
وانا القايل وانا السامع
وجيتى انتى ف عز الضهر
عشان ترمينى ف الشارع
ولا يهمك !!!
ما انا العاشق للون فقرك
وانا الشارى لتوب طهرك
وانا فجرك ونول مَهْرِك
وانا مُهْرِك ف عز الويل
وانا الناى اللى يعزفلك
وانا الموال وبيكى عليل
ما انا بيكى .. ودايب فيكى
وانا عنيكى اللى بتشوفلك
وانا المتخبى .. مكشوفلك !!
وانا راجلك وانا طفلك
وانا رملك وانا طينك
وعاشق طيف محبينك
وبارسمنى على جبينك
تاريخ امبارح اللى فات
وحلم ف بكره لساه جاى
وساكن راضى باتراضا
بطوبك “النىْ”
و باتمنظر و باتباهى على الساكنين ف أفخم ” حيْ ”
وباكل فول بعيش مبلول وطعميه
وعاشقك لو تشوفك عين
يا ورقة تووووت منديْه
يا بنت الإيييييه جمالك إييييه ف عصارى الصيف وشتوية
ولبلابه وصفصافه .. بتغسل شعرها السايح
فى نهر النيل على ضفافه
ونسمة حب هفهافه
يا حريه يا عصريه يا صاحيه ” بشمس ” صبحيه
وأقولهالك .. من الأول
مانيش قابلك عشان قرشين ” وبيت فارِه ”
لاااااا دا انا عاشقك كده ” بِعَبَلِكْ ”
على بعضك بكل مافيكى لو كارِه
ما انا منك .. يادوب منك
مانيش أدك ولا ف سنك
لكن باقدر أزيح عنك
ما انا إنتى .. لأنك نور شموسى إنتى
وانتى الكلمة لو صادقة
وإنتى الحكمة فى صمتى
وأقولهالك كمان تانى
وأنا غرقان باشوفك طوق
ما انا بيكى رقبتى لفووووووق
وعاشقك لما شح الشوق
وراسمك والنهار طااااالع
فى طلعة فجر .. وعز الظهر
فانووووووووس ف الليل
يطبطب نوره ع الشارع
وطييير بيطير وصوت عصافير
ولون بساتينك الخضرا
وطيبة أهلك الفقرا
وطينة أرضك السمرا
على بعضك .. جمال العيشه والعِشْرَه
طب تآمنى بإيه يابنت الإيه وأنا أحلفلك
يمين الله أنا عاشقك ولو حتى
” مافييييش ف جيوبى ربع جنيه ”
” مافييييش ف جيوبى ربع جنيه ”
*********
مجيب عيد