التوهه.. شعر: اسلام العيسوي

متشتتة
كل الحياة في عينيا
صبحت مُهلكة
متقسمة في مليون طريق
مش قادرة أحدد الإتجاه
و لحد امتى هكون كده
تايهه في مفترق الطرق
من غير خريطة للحياة
ولا يافطة حتى تدلني
أمشي في طريق ولا بلاه
كل الطرق قدام عينيا مغيمة
أنا عايشة واقع أو خيال ؟
دي حياة بصحيح ؟
ماتكونش فيلم !
دا باينه حلم !
مايكونش موتت ؟!
أنا حتى مش متأكدة
………
التركة …
…….
أنا ثروتي حبة صور للذكريات
سيباها تركة على المشاع
كل اللي حاضر
و اللي غاب من مشهدي
ليهم نصيب حق انتفاع
حتى اللي باعني بالرخيص
و العمر ضاع في محبته
و اللي اشترى من عمري
عشرة بدون رصيد
و أنا صاحبته
و اللي حاضني في وسط ناس
و الرغي زاد
أول ما لف بسحنته
و اللي يقول ضهر و سند
و أما غدر
الشر جيه من قلبته
و اللي في عينيا كان ملاك
و الطعنة جت من حضرته
قلبي و مشاعري و عشرتي
كانوا للجميع حق انتفاع
جت يعني على حبة صور
حبة سنين من عمر فات
و هاقول بلاش
مش ورثكم
أنا واحدة بايعة عمرها
لكل البشر و الذكريات
و الكل داخل في المزاد
للفرجة بس
و ماشتراش
أنا واحدة واخدة الفرح قسط
كان نفسي مرة أعيشه كاش
……..
طير جريح
…….
حاسة بوجع
و القلب م الظلم استجار
حاسة بنزيف
شرايين بتتقطع سفاح
و القلب ينزف ليل نهار
و كأن دمه مستباح
عايشة و مكسورة الجناح
مش عارفة أطير
و روحي تعبت م الجراح
رافضة الحياة
الحق غاب وسط البراح
و براحي ضاق من فُجرهم
ليه كل شئ بقى غير متاح
حتى القلم سنه اتقصف
مابقاش يعبر ع الألم
حلمي اتدفن
عايشة بندم
على كل يوم فكراه نجاح
أنا عمري راح
الباقي منه يادوب مافيش
يشبه لطير منتوف له ريش
عايش يعافر ضد ريح
بتفتفت كل الحلو فيه
و الباقي منه من الأمل
بيهزه يمكن يوم يعيش
……….
#اسلام العيسوى