في غابة نهر جودينو سمندل سيئ السمعة
يصاحبه الليل على دينه فيسرق م القمر لمعة
في بطئه -لما يتهادى في صمته- يشبه الدمعة
حرقت العشب كالعادة يعيش الدهن في الشمعة
يعيش الزيزفون غابة يموت راكية قتيل الشاي
حلوق الساكس قلابة عرب باكية بتشرق ناي
إعاقة وراثها من طفرة لسهم بينتخب ذكراه
سكن قلبي على زفرة، وسارق نبضه بالإكراه
موطن روحي في القرية برغم الترك
وعازل كهربة وطني عن الدنمارك
ومين قضّى شبابه تراب وما اتعلقش بالجدر فأوان الحصد
وهاجر في الليالي غراب صبح ينعق كبلبل غنى من غير قصد
طلع من صدره يتنفس لقى العنبر في بطن الحوت
عشان الشم له ذكرى صبح جدد حياته بموت
على الضفة المقابلة لقصره نبت قلبه في الضلمة
طرح جنية م الفايكينج سنت رغبته التالمة
ومين يقدر يفك ضفاير الجينجر،
يغازل لمعة الخنجر،
يهادن في احتضاره بشوق سبقله الدبح من عالمة
وعازل كهربة جسمي ما بتوترش.. لأني فاقد الإحساس
بصلي لروحي ما تمطرش.. بتهجد بقلب نحاس
ملامحي نتيجة محسومة في زاوية حيطة بتلطّع
عشان أقرا تاريخ الغد لازم أمسي يتقطّع
على مد البصر كارين على مد الهوى ثومة
سمندل نهر جودينو علاقته بيا مسمومة
علاقتي بالهتاف وقت السحر .. أو بحة من صوت انتحر.. في الجنة همس
علاقتي بالبيات من غير عشا .. أو صحوة من قرص الحشا.. في الجنة غمس
علاقتي بالحواس الخمس دب فسهل أفريقي
نجا م الانقراض، مملوك..
نجا م القلعة، أو لؤلؤ..
نجا م الرمل..
كله في الهوا معزول
وكله قد ما بيسعى يخلد قصته هيزول
أنا سمعت انسحاب ظلي كموجة من معدية
نحيب زغلل عيون النيل ودوب كحله في المية
وطار الشعر يهجيني في جوقة ما ورائية
في أفلام البطل يحتل وينادي
هنا الحرية.. غمتني
تبوغ الرحلة والتخميس
في أحلام انسكاب التلج في بلادي
زهدت الشمس ويارتني..
هنا بتسيّح الكوابيس
هنا المنظر ديكور الجنة .. مش لايق على الدنيا
هناك المخ فيه زنة.. بتتمنى وقاعد ليه؟
مهاجر لم ينل خيرها.. وخيرها لم يزل منية
ما شافش من الصور غيرها.. من الكسرة اللي جوا عنيه
ما نشفش الهوا برا عرق طول السفر جواه
فكمكم روحه واتعطر صبح من لذته أواه
أنين يشبه لقا حورية لما تفكره بحواه
لا دي النشوة اللي خمنها ولا نفس الهوى هواه
أنا بشتاق لها خلسة عشان عيب إني أقول حنيت
ومين يستاهل الحبسة عشان مصر الوطن مش بيت
فليه شيلاني في النني مادام عامية
وليه طالبه الوصال مني ما دام رامية
وليه جنسيتي التانية بتستغربني في الباسبور
وليه صدر الجوى كامل في بيت الذاكرة المشطور
وحشتيني ورق أخضر إذا شم الخريف خمه
ينشف دمه ويهادي الصفا بالنصل
وحشتيني صنوبر حن للبرد ف حما أمه
لأنه من فصيلة حب…… حب الأصل
وحشتيني ولو عديتي من جوايا مش رامش
يا روح لبستني في التكوين وخلت لي الحياة هامش
في غابة نهر جودينو سمندل مختفي حسه
هنا القهوة اسبريسو سيجاري فوينتي وهافانا
ومش بتامل الدخان أنا اللي رقبتي ملووحة
وليه بتهجى في العنوان وأنا عايش في نيرفانا؟
فلا ينفع أكون نشوان ولا بعد الهدى روحة
لقلب ابني اللي معرفهاش وتنهيدته اللي عرفانا
هشوف الجنة بعيونه واسيبله نهاية مفتوحة
قد يهمك أيضا:
تعليقات