الشوق
وقلبي
والحنين مليان
قاسية الحقيقة المُرّة عـ العشمان
عتمة المسافة ما بين بصيرة ونظر
عتمة البلاد لو خالية مـ الاوطان
وقّعت عيني فـ دمعي عـ الرصفان
سيبت العتاب واللوم وقلبي وسيبتني
وأخدت عَرَقي ودمعتيني وكسرة الخاطر
هتفيد ب إيه الحكمة لو ماشي
شايل ألوف من غلطة الشاطر
ويفيد بإيه اللوم على الواقف
باصص لحزنك نظرة المانيكان
وقّعت عيني فـ دمعي عـ الرصفان
الحكمة باينة على المدى والليل بعيد
أنّبت قلبي على الهوى ..
أنّب ضميري اللي اتهدر
أسطول مشاعر بيساومني على البُكا
وعينيا وقعت في البُكا
وقع القمر
عيني على اللي اختارته ياليل السّهر
واختارت ليل الهجر والنكران
وقّعت عيني فـ دمعي عـ الرصفان
عتمة المسافة يا طريق محني
ياهجر خوفت فـ ليلة تلمحني
معرفتش أكدب عـ الليالي وقتما
” وَقَفَ الغريب في البُعد لَوّحَ لي “
معرفتش ارسم عـ الامل لوحة
وافرش حدود الحلم بالالوان
” وقّعت عيني فـ دمعي عـ الرصفان “
اقرأ المزيد:
……..
تعليقات