رحلة.. قصيدة بالعامية المصرية للشاعر: باسل الصباغ
شارك
القطر ضلم والهوا شكة
قلبي اللي زود حمل علي صدري
لو سابني بدري كنت ممكن أطير
أو كان يخفف وطأة السكة
العيون أوسع من الدنيا
الساعات خُدَام لأكل العيش
زهر داير ..كله بيحاول
جربوا يمكن في مرة تصيب
أو تسيب الوحدة وحديها
الونس مللان من الصحبة
العيون بتعاكس الخضرة
السما اقرب من الأرضين
وابعد من التوتة وم الجبنة القريش
الشمس مزنوقة في جيوب الشيش
والشاويش علي قمة الشارع
بيت جراني اتساب وفيه صوتهم
روح عمامي في كوبيات الشاي
طعم سيتي بنكهة النعناع
والبصل مليان دموع امي
…
رمل بيتنا صان ريحتنا
حبنا بس احنا سيبنا
او سهينا
توهنا في الأيام بقت تضحك علينا
واترمينا في حضن فاضي
كل ما بنكبر نطاطي
وكل ما بنكبر قصادي أجري ع البيت القديم
واجري ع الشارع بتاعي
واجري ع المصروف عشان ما الاقش ابويا وتنكسر عيني
ينكسر ضهري المشيب
تغرب الشمس في جبيني وأكون غريب
أرمي جنبي الذكريات
جدي مات
جده مات
واللي فات
عدي في عيون الساعات
…
قصاد الباب لقيت نفسي
حستني قبل ما اشوفني واجري واقولي مين
وكرهت قلبي من الحنين
فقتلتني
حبتني لكن سبتني ونزلت لصحابي
من ضهر بابي خلعت عيني .. سرقتها
حبيتها برضه وسبتها
وكأني واعد كل حاجة هسيبها يوم
او تسيبني
زي ابني
وزي لما هربت والأحلام نستني
وزي شكة
نور بيقتل فيا
صوتها هي
عتمة السكة
وأنا لسة بمشي………
……..
باسل الصباغ
شارك
www.elmkal.com/?p=40525
تعليقات