كنڤاه … شعر: رباب الجورية

انا وعيونك الخاينين
مابينا كلام كتير لسة
مابينا حكاوي واعترافات
تنيّم قلبي كالجثة
فى حضن الغدر يتقلّب
على الجانبين
ويتغطي بتجريحك ومفرش
من دموع العين
وانا الغرقان على شطك
بكاس كدبك بترويني
فتحييني.
وأشرب
وانت تتمطع
على قلبي اللى م الخايبين
م انا اللي عشقت فى عيونك
وسبت عيون لناس صادقين
انا اللى استاهل اني اتْسَاب
مانا اللى امنت وفى قلبي
فتحت لقلبه كل ابواب
.. وانا اللى فى عينه شفت الغدر
ويّا الكدب متغطّي بطرحة وشال
وشفت الصدق متعري..
ومش عاكس صدى صورتي
وقلت لنيتي إصفي
كفاية عتاب
..
انا اللي قِبلت بالفتافيت
وقلت بواقي من حُبه
وصَدَقة وحَسَنة من قُربه
وحِبًي يابت واتحبي
وعشت فى دنيا مش ليا
بلملم اي باقي يفيض
انا اللى رضيت
.
بنيت من قسوته جنة..
وجدّلت الخداع حواديت
عملت بكدبه ضليلة..
فرشت عيوني ليه عناقيد
ونام واتغطي بحناني
وغطااااني بجرح جديد..
وانا اللي مسكت إبرة وخيط
قفلت عينيا بإيديا
وخيّط الجراح فيا
وغرّزت الوجع… فدادين
رسمته في لوحة م الكنڤاه
على حيطان من امل كداب..
وكل ما تِنشع الصورة دموع عِصيان على حُبه
الاقي بشاورة من ضعفي بتتسابق مع كِبري
على خيول صبر متحوّش بقى له زمان
فا مين يلحق
ويمسح اي دمع يكون على رحيلك
بنود إعلان
ومهما باحاول اتدارى
واقول مش فارقة ويّايا
بيصرخ شوقي جوايا
وتطلع له ضوافر موووس
يدوس و بقوة على قلبي
تخليه تدّب فيه الروح
واعيش من تانى حضن الكدب
لو ساعتين
واعيش ازاي
بجرح مغطياه برة
بخيط داااايب
ومن جوة النزيف شغال.
..
وانا الل استااااهل اني اتسااااب
مانا اللي شفت غدره كتاب
وصممت ان اكون جواه
ولو حرفين..
انا الل رضيت
*****
رباب الجورية