مليون قصيده بالعامية للشاعر: رومانى يسرى
مليون قصيده . بتتولد
جوه الألم …
والليل على العشاق. دليل
والشعر مش ورقه وقلم ..
القصه فى عيون تفهمك
وسط السكات ..
وقلوب جميله بتتكسر
لو مره صوت الحق . مات ..
…………
( أبوس ترابه )
……….
كنت لسه يدوب راح احبى
فجاه جه سن الشباب
كل خطوه وليها معنى
كله جاهز للحساب
كلمتين والعمر عدى
فجاه بصوا الشعر شاب
فين يا عمرى كنت طيب
١٠٠ سؤال والرد واضح
س سؤال ومالوش جواب
ذكريات وسنين تاخدنى .
يوم جوازى
يوم ولادة
اغلى حاجه
هى ابنى ..
مره ذكرى ل أمى لما
خدت ملحق فى الدراسه
بعد علقه موت خدتنى
ايد تطبطب.
ايد وشاده بيها ودنى
جايه قدام المرايه
قال يا عينى بتحاسبنى
وف عيونها دموع سراب
جات قالتى خد منابك
م اللى جابك
طلعتلى قميص أبويا
اللى متشال فى الدولاب
ليكوا وحشه والف وحشه
اللى سبتوا الفانيه لينا
وأنتوا مبانيكم تراب
آه يا ابويا وحشنى جدآ
من زمن مشتاق أشوفك
بالحلال والرزق حنه
فيها تتلون كفوفك
لسه فاكر صوت حروفك
وانت بتلاغينى أقولك
قول ورايا
بابا
طب قول ورايا
ماما
مره جدو ومره تيته
وخلطبيطه فى الكلام
وتتوه حروفى
كنت بتحول ظروفى
من مفلس
لأغنى أغنياء صحابه
كنت فاتح ليا قلبك
للى سد فى وشى بابه
ألف رحمه ونور لأبويا
لو هاطول بس أشوفه
دانا هاجرى وأبوس ترابه
كنت هاجرى
وأبوس ترابه
…………
رومانى يسرى
تعليقات